मिथिला नगरपालिकाको संक्षिप्त परिचय
मिथिला नगरपालिका नेपालको मधेश प्रदेश अन्तर्गत धनुषा जिल्लाको उत्तरी भूभागमा पर्दछ। विश्व मानचित्रमा ८५° ५४' ००" पूर्वदेखि ८६° १’ ३०” पूर्वी देशान्तरसम्म र २६° ५४' १५” उत्तरदेखि २७° ७’ ३५” उत्तरी अक्षांशसम्म फैलिएर रहेको मिथिला नगरपालिका मधेश प्रदेशको एउटा प्रमुख कृषि क्षेत्र हो । करिब १८७.९४ वर्ग किलोमिटर क्षेत्रफल रहेको यस नगरपालिकाको उत्तरमा सिन्धुली जिल्ला, पश्चिमतिर महोतरी जिल्ला, बटेश्वर गाउँपालिका, दक्षिणमा क्षिरेस्वरनाथ नगरपालिका र बटेश्वर गाउँपालिका र पूर्वमा गणेशमान चारनाथ र धनुषाधाम नगरपालिका रहेका छन् ।
मिथिला नगरपालिकालाई २०७१ पौष २८ गत्ते नगरपालिका घोषणा गरिएको थियो । नगरपालिका घोषणा गर्दा साबिकका, नकटाझिल, ढल्केबर र बेगाडावर गा. वि . स. समावेश गरी जम्मा ९ वडाहरु रहेका थिए भने मिती २०७३ फागुन २२ गत्ते साविकका तुलसी, पस्पवलपुर गा.वि.स. र क्षिरेश्वर नगरपालिका वडा न. ८ र ९ समवेश गरि जम्मा १० वाडा कायम गरेको थियो भने २०७४ साल जेष्ठ ८ गत्तेको मन्त्रिपरिषद्को निर्णय अनुसार साबिकमा बटेश्वर गाउँपालिकामा समायोजन हुन गएको साबिकको बेगाडाबर गा.वि स. को वडा ५,६ र ७ को तत्कालिन मिथिला नगरपालिकाको वडा नं ८ लाई पुन: मिथिला नगरपालिकामा समायोजन भइ हाल ११ वटा वडा कायम हुन आई अहिलेको मिथिला नगरपालिकाको संरचना तयार भएको हो । धनुषा जिल्लामा नयाँ गठन भएका नगरपालिकाहरुमध्ये धेरै सम्भावना बोकेको नगरपालिकाको रुपमा मिथिलालाई चिनिएको छ । यसका अतिरिक्त सचेत राजनैतिक दल र उत्प्रेरित नगरबासीक सोंच र जागरुकता समेत यो नगरपालिकालाई दरिलो अनि दीगो बिकास गर्ने आधारको रुपमा प्रतिबिम्बित देखिन्छ। राष्ट्रिय जनगणना २०७८ को तथ्याङ्क अनुसार यस नगरपालिका को कूल जनसंख्या ४८,६७६ जना रहेकोमा महिलाको जनसंख्या २४,३६२ र पुरुषको २४,३१४ रहेको छ । यस नगरपालिकामा विभिन्न जातजाति तथा धर्म मान्ने व्यक्तिहरुको बसोबास रहेको छ ।
श्रोतः मिथिला नगरपालिकाको वेवसाईट
